கக்கன் (பொருளியல் சிந்தனைகள்)

கக்கன், தமிழ்நாட்டில் காங்கிரஸ் அரசாங்கத்தில் சில துறைகளின் அமைச்சர், நேர்மையானவர், எளிமையானவர் என்று மட்டுமே அறியப்பட்ட சமூகத்தில் அவருடைய பொருளியல் சிந்தனைகளை இந்நூல் எடுத்துரைக்கிறது. தமிழ்நாட்டின் நீராதார உருவாக்கம், உற்பத்திப் பெருக்கம் போன்ற பொருளியல் செயல்களில் அவருடைய பங்களிப்பைச் சுட்டுகிறது. தமிழ்நாட்டு மக்கள் அனைவரின் கல்வியறிவிலும், விவசாயப் பொருளாதார முன்னேற்றத்திலும் கக்கனின் காத்திரமான செயல்களைக் கோடிட்டுக் காட்டுகிறது. நாட்டின் பொருளாதார முன்னேற்றத்துக்கும் தீண்டாமை ஒழிப்புக்கும் ஜாதி ஹிந்துக்களையும் குடியானவர்களையும் உற்பத்தியிலும் எண்ணத்திலும் நவீனமாக்க வேண்டுமென உணர்ந்து அதனடிப்படையில் அரசாங்கம் செயல்பட்டதை எடுத்துரைக்கும் கக்கன், பொருளியல் மாற்றத்துக்குப் பண்பாட்டைக் கருவியாகப் பயன்படுத்த அறிவுறுத்துகிறார். கக்கன் எழுதிய 'முன்னேற்றப் பாதை' என்ற நூல், மேழிச்செல்வம் மாத இதழில் அவரெழுதிய வாழ்த்துகள், அவருடைய உரைகள் ஆகியவை அவரது பொருளியல் சிந்தனைகளைக் காட்டுகின்றன. அவற்றை ஆவணப்படுத்தும் நோக்கில் மட்டுமன்றி, இக்காலத்துக்கும் கக்கனின் பொருளியல் சிந்தனைகள் அவசியமாக இருப்பதால் அவை இந்நூலில் தொகுக்கப்பட்டுள்ளன.