புதிய உரைநடை

கவிதையை மடக்கி மடக்கி எழுதுகிறோம். உரை நடையைத் தொடர்ந்து எழுதிச் செல்கிறோம். எனவே இவை வெறும் புறவடிவம் சார்ந்த நிலையில் மட்டுமே வேறுபாடு கொண்டவை என்று எண்ணுதல் கூடாது. இரண்டுமே தனித்தனியான முனைப்பான தனிப்பண்புக் கூறுகளைக் கொண்ட - துறைகள். கவிதையையும் உரைநடையையும் பின்வருமாறு ஒப்பிட்டு -வேறுபடுத்திக் - காட்டலாம். கவிதை கடற்பரப்பைப் போன்றது; உரைநடை நிலப்பரப்புப் போன்றது. கடற்பரப்பு திரவநிலை சான்றது; நிலப்பரப்பு திடநிலை சான்றது. முன்னது அலையதிர்வுகள் கொண்டது; பின்னதோ வெட்டுத் தடங்கள் நிரம்பியது. கடலும் நிலமும் தம்முள் வேறுபாடுடையன என்பதை மறுப்பார் யார்? எனவே கவிதையும் உரைநடையும் ஸ்தூல நிலையில் மட்டுமன்றி சூக்கும நிலையிலும் வேறுபட்டுப் பிரிந்து நிற்பன என்பது வெளிப்படை